كل ما تحتاج معرفته حول حمام الرمال بصحراء مرزوكة
#رمال_مرزوكة #السياحة_الداخلية
#منقول_للإفادة
هذه معلومات عن الحمامات الرملية:
موسم الحمامات الرملية كايبدأ من حوالي20 فشهر 6 إلى حوالي 10 فشهر 9.
بعدما كاتوصل مركز مرزوگة كاتاخد محل للكراء، كاينين محلات للكراء نتا او جهدك، كاين غرف شعبية، شقق مجهزة، فنادق عادية وفنادق مصنفة، مخيمات عادية ومخيمات مصنفة...
غادي تحتاج كاشة (مانطة) خاصة بالعملية ماشي بالضروري تجيبها معاك كايتباعو في عين المكان ب 40dh، كادير مع الشخص لي غادي يقابلك فالعملية كاين أبناء المنطقة مختصين في ذلك، كايوجد ليك الحفرة او مع هاذيك 11h كاتبدأ عملية الحمامات وتستمر إلى غاية 17h مسائا او كل واحد كايدخل فالوقت المناسب ليه او كاين لي كايدير عملية في الزوال و عملية بعد صلاة العصر...
الناس العاديين لي عندهوم صحة جيدة ممكن ليهوم يديرو الحمام الرملي بشكل عادي من غير بعض الحالات لي ممنوع عليهم او هوما الناس لي عندهوم بعض الأمراض المزمنة بحال القلب، السكر (درجة متقدمة)، الضيقة (درجة متقدمة)، الأعصاب (درجة متقدمة)، لي كايطيح ليهوم الطانسيو... إلا بغيتي تحيد الشك فهاذ البلان يمكن ليك تزور الطبيب لي فالمستوصف المحلي هو كايعبر ليك الطانسيو او يدير ليك فحص أولي او يقوليك واش الحالة الصحية ديالك كاتأهلك باش دير الحمام الرملي ولا لا...
قبل ما تمشي للحمام ديال الزوال حاول ما تغداش عاد تمشي وإنما تاكل شي حاجة خفيفة مثلا التمر والحليب او شلاضة او عصير... المهم ماتعرگهاش مرقة ولا طاجين او تمشي حيث ماغاديش تستافد مزيان...
كاتدي معاك الكاشة او الماء او شي تارازة ولا طربوش او فوطة صغيرة او شورط خفيف او شي فوقية، ماتديش معاك قوة الملابس او تفادى تدي معاك اي حاجة ممكن طيح ليك فالرمة او تجلا ليك مثل النقود مفاتيح غير ضرورية.... إلخ
فاش يالاه كاتهبط للحفرة كاتجيك سخونة او فاش كايلوح عليك السيد لي مقابلك الرملة كاتجيك سخونة غير صبر هاذيك 6 ثواني الأولى صافي كاتولي دافية او ترتاح او شرب الماء شوية او نتا فالحفرة باش تعرق مزيان غير مايكونش بارد من الأفضل يكون عادي او ماتعطلش فالحفرة 5 إلى 8 دقائق ماكس كافية حيث الرملة الدور ديالها هيا تسخنك او تسرع ليك الدورة الدموية او نوض بحالك او هنا ماتبقاش مغان او معاند مع راسك ولا مع صحابك فالوقت او تعطل فالحفرة 15 دقيقة ولا نصف ساعة حتى تسخف كيما كايديرو شي وحدين مازال مافاهمينش، الصحة مامعاهاش اللعب...
بعدما كاتخرج من الحمام (الحفرة) السيد لي مقابلك كايلوي عليك الكاشة من البرد مزيان او إما تمشي للمحل مباشرة ولا ترتاح تماك قريب فشي ضل ديال النخيل او شجر الدلاي المنتشر هناك او خيم صغيرة يبنيها الأشخاص لي كايقابلو تماك ولا ترجع فالسيارة ديالك للمحل... هنا حسب بلان ديال كل واحد...
فاش تخرج من الحفرة زيد شرب الماء باش تعوض الماء لي خرج من الجسم ديالك كاين لي كايشرب حتى اتاي بالعشوب حتى هو زوين كايعاون باش تزيد تعرق مزيان حتى كاتولي الكاشة كلها عرق او هنا كاتخرج من الجسم ديالك البرودة او السموم...
من بعدما كاتحس براسك صافي مابقيتيش كاتعرق صافي كاتمشي دوش بالماء الساخن ماشي بالبارد حذاري او كاين لي غير كايتوضأ او ماكايدوش حيث الرملة كاتنشف او طيح بوحدها... حتى كايدوز ديك ثلاث ايام عاد كايدوش ولا حتى كايرجع او يدوز على حمامات مولاي علي الشريف لي كاينين ما بين الرشيدية او الريش هوما حمامات مائية ساخنة وطبيعية افضل من حمامات مولاي يعقوب...
بعض الأنشطة لي ممكن ديرها فالمنطقة مساءا إما الذهاب للشارع الرئيسي او دير شي قهيوة ولا تمشي طلع لواحد جبل الرمال عالي او تستمتع بغروب الشمس من منظر بانورامي يطل على المنطقة ككل او كاتبان ليك الحدود مع الجزائر هذا هو التحدي لي كايديروه الناس بزاف كاطلع ليه إما مسائا وراء العصر او صباحا بعد صلاة الفجر أو تستمتع بمنظر شروق الشمس او باش كاتفادى حرارة منتصف النهار حيث هذا الوقت خاص بالحمام الرملي. ممكن تزور واحد الفيلاج فيه سكان محليين أصلهم گناوة او تمزك معاهوم شوية د الهجهوج او تاگناويت، ممكن تركب الجمال وسط الرمال، ممكن تركب دراجات رباعية الدفع الكوادات و البوگيات، ممكن تركب سيارة 4×4 او دير جولة وسط الرمال، ممكن تزور واحد المتحف خاص بالسيارات الفارهة والقديمة... ممكن تاكل المدفونة اكلة محلية، ممكن تزور احد المخيمات او تبات تماك وسط الرمال، ممكن تزور واحد البلاصة فيها les graveurs رسومات تاريخية قديمة، ممكن تعوم في المسبح في احد الفنادق هناك... وغيرها من الأنشطة...
شنو كاتستافد من الزيارة اولا كاداوي صحتك البدنية حيث الحمامات الرملية دواء فعال لبرودة المفاصل او برودة النبولة والجهاز التناسلي او كاداوي صحتك النفسية حيث الجسم ديالك كايتخلص من الطاقة السلبية لانه يكون في تماس مباشر مع الأرض وبلورات الرمال الذهبية كذلك غادي تحس بعقلك ولا خفيف او تحيد منو هذاك الستريس او الضغط لي كايسببوا روتين العمل أو الثلوت ديال الهواء او الثلوث الصوتي ديال المدن حيث الهواء ديال الصحراء نظيف، بيو، خفيف، هادئ او غادي تحس بواحد الراحة النفسية لا مثيل لها او تبغي ترجع كل مرة هاذشي بالتجربة حسب الأقوال ديال الناس لي كايجيو كل سنة أو لي فايت ليه جاء او قرأ هاذ البوسط راه عارف هاذشي...
(منقول)
تعليقات
إرسال تعليق